औंध जिल्हा रुग्णालयातील कोट्यवधींच्या ICU साहित्याचा शोध सुरू; सात दिवसांत चौकशीचे आदेश

दिपसागर न्यूज ऑनलाइन पोर्टल सेवा:

पुणे : कोरोना महामारीच्या काळात रुग्णांचे प्राण वाचवण्यासाठी औंध जिल्हा रुग्णालयात उभारण्यात आलेल्या ५० खाटांच्या अत्याधुनिक अतिदक्षता विभागातील (ICU) साहित्याबाबत गंभीर प्रश्न उपस्थित झाले आहेत. कोट्यवधी रुपये खर्च करून उभारण्यात आलेल्या या विभागातील महागडी वैद्यकीय उपकरणे आणि साहित्य सध्या नेमके कुठे आहे, याबाबत तक्रार दाखल करण्यात आली आहे.

या प्रकरणाची दखल घेत आरोग्य उपसंचालक डॉ. भगवान पवार यांनी उच्चस्तरीय चौकशीचे आदेश दिले असून, सात दिवसांत सविस्तर अहवाल सादर करण्याचे निर्देश दिले आहेत.

नेमकी तक्रार काय?

औंध जिल्हा रुग्णालयाची एकूण क्षमता ३०० खाटांची असून, रुग्णालयात पूर्वी १२ खाटांचा ICU विभाग होता. मात्र, कोरोना काळात वाढलेल्या रुग्णसंख्येचा विचार करून शासनाने विशेष निधी उपलब्ध करून ५० खाटांचा आधुनिक ICU विभाग उभारला.

आरोग्य हक्क कार्यकर्ते शरत शेट्टी यांनी २७ जुलै रोजी केलेल्या तक्रारीनुसार, या ICU विभागातील अनेक सुविधा आणि महत्त्वाचे वैद्यकीय साहित्य सध्या उपलब्ध नसल्याचा दावा करण्यात आला आहे.

तक्रारीमध्ये विशेषतः व्हेंटिलेटर, मॉनिटर, ऑक्सिजन यंत्रणा तसेच इतर महागड्या वैद्यकीय उपकरणांच्या उपलब्धतेबाबत प्रश्न उपस्थित करण्यात आले आहेत.

चौकशीत काय तपासले जाणार?

आरोग्य विभागाने या प्रकरणाची गांभीर्याने दखल घेतली असून, चौकशीदरम्यान ICU विभागातील साहित्याची प्रत्यक्ष पाहणी केली जाणार आहे.

यामध्ये—

५० खाटांच्या ICU साठी मंजूर झालेले साहित्य किती होते?

– प्रत्यक्षात किती साहित्य रुग्णालयाला प्राप्त झाले?

– त्याची नोंद कोणत्या रजिस्टरमध्ये आहे?

– सध्या किती उपकरणे उपलब्ध आहेत?

– अनुपलब्ध साहित्य दुसरीकडे हलविण्यात आले आहे का?

साहित्याच्या देखभालीची आणि वापराची जबाबदारी कोणाची होती?

यासह विविध बाबींची तपासणी केली जाणार आहे.

दोष आढळल्यास कारवाई

या चौकशीत साहित्याबाबत अनियमितता, निष्काळजीपणा किंवा जबाबदारी निश्चित झाल्यास संबंधित अधिकारी-कर्मचाऱ्यांवर शिस्तभंगाची कारवाई, तसेच आवश्यक असल्यास फौजदारी कारवाई करण्याचे संकेत देण्यात आले आहेत.

जिल्हा शल्यचिकित्सक डॉ. अंबादास देवमाने यांना चौकशी करून सात दिवसांच्या आत पुराव्यांसह अहवाल सादर करण्याचे आदेश देण्यात आले आहेत. निर्धारित मुदतीत अहवाल सादर न झाल्यास त्याची जबाबदारी निश्चित केली जाईल, असेही आदेशात स्पष्ट करण्यात आले आहे.

कोट्यवधींच्या निधीचा हिशेब लागणार

कोरोना काळात सार्वजनिक आरोग्य व्यवस्थेसाठी शासनाने मोठ्या प्रमाणात निधी उपलब्ध करून दिला होता. त्यातून उभारण्यात आलेल्या ५० खाटांच्या ICU विभागातील साहित्याबाबतच प्रश्न उपस्थित झाल्याने या प्रकरणाकडे आता नागरिकांचेही लक्ष लागले आहे.

शासनाचा निधी, खरेदी केलेले साहित्य आणि त्याची सध्याची उपलब्धता याचा संपूर्ण हिशेब चौकशीतून समोर येणे आवश्यक आहे.

“कोविड काळात शासनाच्या निधीतून उभारण्यात आलेल्या ५० खाटांच्या ICU विभागातील साहित्याबाबत मी तक्रार केली होती. आता उच्चस्तरीय चौकशीचे आदेश झाल्याने संपूर्ण प्रकरणाची पारदर्शक आणि निष्पक्ष चौकशी होऊन सत्य समोर यावे, ही अपेक्षा आहे.”

— शरत शेट्टी, आरोग्य हक्क कार्यकर्ते»

रुग्णसेवेवर परिणाम होतोय का?

कोरोनासारख्या आपत्कालीन परिस्थितीत तयार करण्यात आलेली अत्याधुनिक आरोग्य सुविधा आज पूर्ण क्षमतेने कार्यरत आहे का, हा देखील महत्त्वाचा प्रश्न आहे. मनुष्यबळ, उपकरणे आणि व्यवस्थापनाच्या अभावामुळे ICU सुविधा प्रभावीपणे वापरली जात नसल्यास त्याचा थेट परिणाम रुग्णसेवेवर होऊ शकतो.

आता आरोग्य विभागाच्या चौकशीत ICUचे प्रत्यक्ष चित्र, साहित्याचा हिशेब आणि जबाबदारी निश्चित होते का, याकडे पुणेकरांचे लक्ष लागले आहे.