दिपसागर न्यूज ऑनलाईन पोर्टल सेवा:
८०० मीटर सेवा रस्ता पूर्ण; ड्रेनेज आणि पावसाळी वाहिन्यांचेही काम प्रगतिपथावर, मात्र विद्युत पोल व भूसंपादनाचे अडथळे कायम
कात्रज | प्रतिनिधी
गेल्या अनेक वर्षांपासून रखडलेल्या कात्रज-कोंढवा रस्ता रुंदीकरणाच्या प्रकल्पाला आता प्रशासनाकडून वेग देण्यात आला आहे. पुणे महापालिका आयुक्त नवल किशोर राम यांनी या महत्त्वाकांक्षी प्रकल्पाची पाहणी करत मार्चअखेर संपूर्ण काम पूर्ण करण्याचे उद्दिष्ट निश्चित केले आहे.
राजस सोसायटी ते शत्रुंजय चौक या सुमारे १.६ किलोमीटरच्या मार्गिकेत ८०० मीटर सेवा रस्त्याचे काम पूर्ण झाले असून, पावसाळी पाण्याचा निचरा आणि ड्रेनेजसाठी सुमारे १०५० मीटर वाहिन्यांचे काम पूर्ण झाल्याची माहिती प्रशासनाने दिली आहे.
मात्र, रस्त्याच्या विकासाला अडथळा ठरणारे विद्युत पोल आणि ओव्हरहेड वाहिन्या अद्याप अनेक ठिकाणी कायम आहेत. त्याचबरोबर भूसंपादनाच्या प्रक्रियेतून राहिलेल्या सुमारे दहा मालमत्तांचा प्रश्नही पूर्णपणे निकाली निघालेला नाही. त्यामुळे मार्चअखेरची मुदत गाठण्यासाठी प्रशासनासमोर मोठे आव्हान कायम आहे.
विभागांमध्ये समन्वयाचा अभाव नको
पाहणीदरम्यान आयुक्तांनी विविध विभागांच्या अधिकाऱ्यांकडून कामाच्या प्रगतीचा आढावा घेतला. कोणत्याही विभागातील समन्वयाचा अभाव, परवानगी किंवा प्रशासकीय निर्णयामुळे काम रखडता कामा नये, असे स्पष्ट निर्देश त्यांनी दिले.
आवश्यक ठिकाणी प्रत्यक्ष पाहणी करून तातडीने निर्णय घेण्याची जबाबदारी संबंधित अधिकाऱ्यांवर सोपविण्यात आली आहे. विद्युत पोल व वाहिन्या हटविण्याची कार्यवाही तातडीने करण्याच्या सूचनाही देण्यात आल्या.
तीन टप्प्यांत रस्ता रुंदीकरण
कात्रज-कोंढवा रस्ता रुंदीकरणाचे काम टप्प्याटप्प्याने सुरू आहे. राजस सोसायटी ते शत्रुंजय चौक हा पहिला भाग ५४ मीटर रुंदीचा, शत्रुंजय चौक ते पिसुळी हद्द हा दुसरा भाग ८४ मीटर रुंदीचा, तर राजस सोसायटी ते शत्रुंजय चौकदरम्यानचा उर्वरित ३० मीटर रुंदीकरणाचा भाग प्रस्तावित आहे.
या प्रकल्पामुळे कात्रज, कोंढवा, शेलारमळा, महादेवनगर आणि परिसरातील वाहतूक व्यवस्थेत मोठा बदल अपेक्षित आहे.
माऊलीनगर ग्रेडसेपरेटरकडेही लक्ष
आयुक्तांनी माऊलीनगर येथील प्रस्तावित ग्रेडसेपरेटरच्या आराखड्याची माहिती घेतली. कात्रज-कोंढवा रस्ता तसेच शेलारमळा आणि महादेवनगर परिसरातील नागरिकांना उड्डाणपुलाचा सुलभ वापर करता यावा, यासाठी हा ग्रेडसेपरेटर महत्त्वाचा ठरणार आहे.
मार्चअखेरपर्यंत प्रकल्प पूर्ण होणार?
“कात्रज-कोंढवा रस्ता रुंदीकरण हा शहरासाठी महत्त्वाचा प्रकल्प आहे. त्याला प्राधान्य देण्यात आले असून आवश्यक आर्थिक तरतूदही करण्यात आली आहे. काम वेगाने आणि दर्जेदार पद्धतीने पूर्ण करून मार्चअखेर प्रकल्प मार्गी लावण्याचा प्रयत्न आहे,” असे आयुक्त नवल किशोर राम यांनी सांगितले.
रस्ता पूर्ण झाल्यानंतर या परिसरातील वाहतूक कोंडी कमी होण्यासोबतच परिसराच्या विकासाला आणि जमिनीच्या मूल्यवाढीलाही चालना मिळण्याची अपेक्षा व्यक्त केली जात आहे.
दरम्यान, विद्युत पोल हटविणे आणि उर्वरित भूसंपादनाचा प्रश्न वेळेत मार्गी लागला, तर आयुक्तांनी निश्चित केलेली मार्चअखेरची मुदत प्रत्यक्षात येणार का, याकडे आता कात्रज-कोंढवा परिसरातील नागरिकांचे लक्ष लागले आहे.
