पुणे पोलीस दलात खळबळ: २८ लाखांच्या लाच प्रकरणात सहायक पोलीस निरीक्षक वैशाली तोटेवार निलंबित
दिपसागर न्यूज ऑनलाईन पोर्टल सेवा
पुणे: पुणे पोलीस दलातील एका वरिष्ठ महिला अधिकाऱ्यावर झालेल्या निलंबनाच्या कारवाईमुळे सध्या संपूर्ण विभागात मोठी खळबळ उडाली आहे. आर्थिक गुन्हे शाखेतील (EOW) सहायक पोलीस निरीक्षक वैशाली मुरलीधर तोटेवार यांना २८ लाख रुपयांची लाच मागितल्याप्रकरणी दोषी धरत पोलीस आयुक्त अमितेश कुमार यांनी तत्काळ निलंबित केले आहे.
नेमके प्रकरण काय?
वैशाली तोटेवार या आर्थिक गुन्हे शाखेत एका गुन्ह्याचा तपास करत होत्या. या तपासादरम्यान तक्रारदाराला मदत करण्याच्या आणि प्रकरणाचा निकाल त्यांच्या बाजूने लावण्याच्या बदल्यात तोटेवार यांनी मोठ्या रकमेची मागणी केली होती. या जाचाला कंटाळून तक्रारदाराने लाचलुचपत प्रतिबंधक विभागाकडे (ACB) तक्रार नोंदवली.
‘एसीबी’चा सापळा आणि अटक
तक्रारीची शहानिशा केल्यानंतर, ‘एसीबी’ने कोरेगाव पार्क परिसरातील आलिशान ‘कॉनराड’ हॉटेल समोर सापळा रचला. तोटेवार यांनी ही लाचेची रक्कम स्वतः न स्वीकारता संभाजी चव्हाण नावाच्या एका खासगी व्यक्तीला घेण्यास सांगितले होते. २८ लाख रुपये स्वीकारताना चव्हाणला रंगेहात पकडण्यात आले. त्यानंतर झालेल्या चौकशीत या कटाची मुख्य सूत्रधार वैशाली तोटेवार असल्याचे स्पष्ट झाले.
पदोन्नतीच्या दिवशीच निलंबन
या प्रकरणातील सर्वात धक्कादायक बाब म्हणजे, १ मे २०२६ रोजी तोटेवार यांना पोलीस निरीक्षक (PI) पदी बढती मिळाली होती. त्यांना नवीन नियुक्तीच्या ठिकाणी जाण्यासाठी कार्यमुक्त करण्याचे आदेशही निघाले होते. मात्र, कार्यमुक्त झाल्यानंतरही त्यांनी जुन्या प्रकरणाचा पाठपुरावा करून लाच घेण्याचा प्रयत्न केला. हा प्रकार उघड होताच पोलीस आयुक्तांनी त्यांचे जुने आदेश रद्द करून थेट निलंबनाचे आदेश काढले.
कठोर कारवाईचा इशारा
पोलीस आयुक्तांनी काढलेल्या पत्रात म्हटले आहे की, अशा प्रकारच्या कृत्यांमुळे पोलीस दलाची प्रतिमा जनमानसात मलीन झाली आहे. त्यामुळेच मुंबई पोलीस अधिनियम १९५१ नुसार ही कठोर कारवाई करण्यात आली आहे.
